آئی سی سی کی سالانہ کانفرنس میں ٹوئنٹی 20 لیگز کو کرپشن سے بچانے کیلیے سخت اقدامات تجویز کیے جائیں گے، فکسنگ میں ملوث کرکٹرز اور آفیشلز کے سزاؤں سے بچ نکلنے پر اینٹی کرپشن اینڈ سیکیورٹی یونٹ کی تشویش بڑھ گئی، مقابلوں کے میزبان ممالک میں خصوصی قوانین کی تشکیل کا مطالبہ کیا جائے گا۔

ون ڈے کرکٹ میں فیلڈنگ کی پابندیوں اور دونوں اینڈ سے نئی گیندیں استعمال کرنے کے فیصلے پر نظر ثانی کی جائے گی، بنگلہ دیش کی تیاریاں نامکمل ہونے کے سبب ورلڈ ٹوئنٹی 20 کی منتقلی کا مطالبہ بھی زور پکڑگیا ہے۔ تفصیلات کے مطابق گزشتہ چند برس میں میچ اور اسپاٹ فکسنگ کے متعدد اسکینڈلز نے شرفا کے کھیل کا دامن داغدار کرنے میں کوئی کسر نہیں چھوڑی، حالیہ آئی پی ایل اسکینڈل میں شری شانتھ سمیت 3 بھارتی کرکٹرز کے ملوث ہونے کے بعد بنگلہ دیش کے اشرفل بی پی ایل میں کرپشن کا اعتراف کرچکے، گزشتہ سال ایک بھارتی چینل نے پاکستانی ندیم غوری سمیت اسٹنگ آپریشن کے ذریعے کرپشن کیلیے رضامند امپائرز کو بے نقاب کیا تھا۔

کرکٹ حلقوں میں ٹوئنٹی 20 لیگز کو کرپشن کا گڑھ قراردیا جا رہا ہے، کھیل کی تطہیر کا عمل تیز کرنے کے مطالبات میں تسلسل کے بعد آئی سی سی اینٹی کرپشن اینڈ سیکیورٹی یونٹ نے لندن میں جاری سالانہ کانفرنس میں متعلقہ بورڈز کو سخت اقدامات تجویز کرنے کا ارادہ کرلیا ہے۔ ذرائع کے مطابق اے سی ایس یو کے سربراہ سر رونی فلینیگن شرکا کو مسائل کی سنگینی کا احساس دلاتے ہوئے ایسا سسٹم وضع کرنے کیلیے کہیں گے جس میں کرپٹ کھلاڑیوں اور آفیشلز کیلیے بچ نکلنے کے راستے مسددو ہوجائیں۔

یاد رہے کہ بھارتی عدالتی نظام میں کھیلوں میں کرپشن کے حوالے سے خصوصی کرمنل قوانین نہ ہونے کی وجہ سے کئی مجرموں پر ہاتھ ڈالنا مشکل ہوجاتا ہے، یہی صورتحال سری لنکا اور بنگلہ دیش کی بھی ہے۔ذرائع کے مطابق اے سی ایس یو کو تشویش ہے کہ کرپٹ کھلاڑی، آفیشلز اور بکیز قوانین میں نرمی کا فائدہ اٹھاتے ہوئے مکروہ دھندہ ڈھٹائی سے جاری رکھتے ہیں، فلینیگن تینوں ممالک کے کرکٹ بورڈز سے مطالبہ کر سکتے ہیں کہ وہ اپنی وفاقی حکومتوں کو ایسے سخت قوانین تشکیل دینے کیلیے کہیں جس سے کھیلوں میں بدعنوانی کے مرتکب افراد کی زیادہ سے زیادہ حوصلہ شکنی ہو۔

دریں اثنا چیف ایگزیکٹیوز میٹنگ میں ون ڈے کرکٹ میں فیلڈنگ کی پابندیوں اور دونوں اینڈ سے نئی گیندیں استعمال کرنے کے فیصلے پر نظر ثانی کی جائے گی،وضع کردہ قوانین پر بھارتی کپتان مہندرا سنگھ دھونی سخت تنقید کرتے رہے ہیں، چیمپئنز ٹرافی میں مختلف ٹیموں کا اس حوالے سے ردعمل سامنے رکھتے ہوئے فیصلہ کیا جائے گا کہ ورلڈ کپ سے قبل کیا تبدیلیاں یا ترامیم مناسب ہوں گی۔

کمیٹی بعض رکن ممالک کی طرف سے زیادہ ٹوئنٹی 20 اور ون ڈے کھیلنے کیلیے فیوچر ٹور پروگرام کے تحت طے شدہ ٹیسٹ میچز کو نظر انداز کرنے کے رجحان کا بھی جائزہ لے گی۔طویل فارمیٹ کی بقا کیلیے مقابلوں میں توازن برقرار رکھنے پر زور دیا جائے گا۔ بنگلہ دیش کی تیاریاں نامکمل ہونے کے سبب 16 مارچ سے شیڈول ورلڈ ٹوئنٹی 20 کی منتقلی کا مطالبہ بھی زور پکڑ گیا ہے۔

پاک ویسٹ انڈیز سیریز کے12 سے 28 جولائی تک انعقاد کا امکان ہے۔

اس دوران 5 ون ڈے اور2 ٹوئنٹی 20 میچز کھیلے جائیں گے،ذرائع کے مطابق ابتدائی دونوں ایک روزہ مقابلوں کی میزبانی گیانا کرے گا، اگلے تینوں میچز سینٹ لوشیا میں ہوں گے، ٹی ٹوئنٹی مقابلے سینٹ ونسنٹ میں ہو سکتے ہیں۔ دوسری جانب ٹور کیلیے سلیکشن کمیٹی کا اجلاس یکم جولائی کو لاہور میں ہوگا، حتمی اسکواڈ کا حصہ بنانے سے قبل کھلاڑیوں کے فٹنس ٹیسٹ بھی ہوں گے۔

ذرائع کے مطابق چیف سلیکٹر اقبال قاسم کی زیر صدارت قومی سلیکشن کمیٹی نے پلیئرز کی فہرست تو تیارکرلی تھی مگر قائم مقام چیئرمین پی سی بی نجم سیٹھی نے انھیں ہیڈ کوچ ڈیو واٹمور سمیت کپتانوں مصباح الحق اور محمد حفیظ سے مشاورت کی ہدایت دی ہے، نوجوان پلیئرز احمد شہزاد، عمر اکمل، حارث سہیل، رضا حسن، صہیب مقصود، وکٹ کیپرز عدنان اکمل اور محمد رضوان کا فٹنس ٹیسٹ لینے کی ہدایت دی گئی ہے،فٹنس رپورٹ کی روشنی میں ہی انھیں اسکواڈ میں شامل کرنے کا فیصلہ کیا جائے گا۔

Imran hashmi, 

 بالی ووڈ کی بلاک بسٹر فلم دی ڈرٹی پکچرزکی جوڑی عمران ہاشمی اور ودیا بالن ایک بار پھر سلور اسکرین پر تہلکہ مچانے کے لیے تیار ہیں جن کی آنے والی کامیڈی فلم’’گھن چکر‘‘ کے نئے گانے کی وڈیو منظرِ عام پر آگئی ہے۔

امیتابھ بھٹا چاریہ کے تحریر کردہ’’اللہ مہربان‘‘کے بولوں پر مبنی اس گانے کو فلم کے موسیقار امیت ترویدی نے دیویا کمار کی آواز میں ریکارڈ کیا ہے۔ ہدایتکار راجکمار گپتا کی اس فلم میں عمران ہاشمی اور ودیا بالن کے ساتھ راجیش شرما اور نمت داس اہم کردار ادا کررہے ہیں۔ یو ٹی وی موشن پکچرز کے تحت عمران اور ودیا کی کامیڈی سے بھرپور یہ گھن چکر فلم 28 جون کو سینما گھروں کی زینت بنائی جائے گی۔

امیتابھ بچن کا کہنا ہے کہ رانجھنا جیسی فلمیں انہیں حسرت سے یہ سوچنے پر مجبور کر دیتی ہیں کہ انہیں ان کا حصہ کیوں نہیں بنایا گیا۔

میتابھ بچن نے اپنے بلاگ میں لکھا کہ چیمپئنز ٹرافی میں بھارت کی فتح کی خوشی میں انہوں نے فلم رانجھنا دیکھی جو انہیں بے حد پسند آئی۔ بگ بی نے رانجھنا فلم کی تعریف کرتے ہوئے کہا کہ رانجھنا جیسی فلمیں دیکھ کر انہیں شدت سے یہ احساس ستاتا ہے کہ انہیں ان فلموں میں کاسٹ کیوں نہیں کیا گیا، انہوں نے کہا کہ چھوٹے ہی کردار میں صحیح مگر میں ان بہترین فلموں میں کام کرنا چاہتا ہوں کیونکہ مجھے آج کل کی جوان نسل کا ٹیلنٹ دیکھ کر بے حد خوشی محسوس ہوتی ہے۔

واضح رہے کہ فلم رانجھنا میں سونم کپور نے اپنی اداکاری کے جلوے دکھائے ہیں اور ان کے اپوزٹ ہیرو کا کردار اداکار دھنش نے نبھایا ہے، رانجھنا اداکار دھنش کی بالی ووڈ میں پہلی فلم ہے، فلم کی موسیقی اے آر رحمان نے دی ہے۔

پریانکا چوپڑا کے البم ’’ان مائی سٹی‘‘ کا دوسرا گانا ’’اگزاٹک‘‘ انٹرنیٹ پر لیک ہو گیا جس کے بارے میں اداکارہ نے کسی غم و غصے کا اظہار نہیں کیا۔

پریانکا چوپڑا نے سماجی رابطے کی ویب سائٹ ٹوئٹر پر لکھا کہ میرے البم کا گانا لیک ہوگیا اور مجھے اس پر غصہ بھی ہونا چاہیئے مگر میں اس گانے کو اپنے مداحوں کے ساتھ شیئر کر کے خوش ہوں، ساتھ ہی انہوں نے کہا کہ گانا باضابطہ طور پر کسی بھی لمحے ریلیز کر دیا جائے گا۔

پریانکا نے اپنے مداحوں اور میوزک سے دلچسپی رکھنے والوں سے ٹوئٹر پر کہا کہ وہ گانا سن کر اپنی رائے سے انہیں ضرور آگاہ کریں۔ پریانکا کے اس گانے میں امریکی ریپر پٹ بال نے بھی اپنی آواز کا جادو جگایا ہے اور گانے کی شاعری میں انگریزی کے ساتھ ساتھ ہندی بول بھی شامل کئے گئے ہیں۔

فلم "سانوریا" کے ایک گانے میں رنبیر کپور مکمل برہنہ نظر آتے ہیں جب کہ جان ابراہم نے فلم نیویارک کے بعد فلم’’دوستانہ‘‘میں بھی بغیر کپڑے پہنے بولڈ سین عکس بند کرایا۔

بالی ووڈ نے گزشتہ کچھ سالوں کےدوران جس طرح اپنی فلموں ميں جدید اور مغربی ٹیکنالوجی کا استعمال شروع کیا ہے وہیں فلموں میں بولڈمناظر کی فلم بندی میں بھی وہ مغرب کی تقلید کرتا نظرآتا ہے جس کے باعث نہ صرف اداکارائیں بلکہ اداکار بھی اپنے برہنہ جسم کی نمائش کرنے میں کوئی ہچکچاہٹ محسوس نہیں کررہے ہیں۔

بالی ووڈ ادکار رنبیر کپور نے اپنی پہلی ہی فلم ”سانوریا“ میں اتنا بولڈ منظر فلم بند کرایا کہ کوئی بھی نیا اداکار ایسا کرنے سے ضرور گھبراتا، فلم ”سانوریا“ کے ایک گانے میں رنبیر کپور مکمل برہنہ نظر آتے ہیں، اس دوران انہوں نے اپنا عریاں پن چھپانے کے لئے انتہائی باریک تولیے کا استعمال کیا تاہم وہ اس میں کامیاب نہ ہو سکے، اداکار جان ابراہم جن کا فلم ’’نیویارک‘‘ ميں برہنہ منظر فلم بند کرانے کے بعد کہنا تھا کہ وہ اس کی عکس بندی کے دوران کافی محظوظ ہوئے، جان ابراہم نے اس کے بعد  فلم’’دوستانہ‘‘میں بھی بغیر کپڑے پہنے بولڈ سین عکس بند کرایا۔

رنبیر اور جان ابراہم کے علاوہ نیل نتن مکیش  فلم ’’جیل‘‘ ،  راج کمار  فلم “شاہد‘‘  اور نئے اداکار میراڈونا ریبیلو فلم ’’پنکھ‘‘ میں اپنے برہنہ جسم کی نمائش کر چکے ہیں جب کہ اشمت پٹیل بھی مردوں کے ہیلتھ میگزین کے فرنٹ پیچ کے لیے برہنہ تصویر بڑی دیدہ دلیری سے بنواچکے ہیں۔

 سندھ ہائیکورٹ کے سینئرجج جسٹس مقبول باقرکے اسکواڈ پربم حملے کے نتیجے میں 7 افراد جاں بحق اور 15 زخمی ہوگئے۔

کراچی کے علاقے برنس روڈ میں دھماکے  کے نتیجے میں 7 افراد بحق اور 15 زخمی ہوگئے، دھماکے میں سندھ ہائیکورٹ کے سینئرجج جسٹس مقبول باقر کےاسکواڈ پر کو نشانہ بنایا گیا، ریسکیو ٹیموں نے جائے حادثہ پر پہنچ کر زخمیوں کو سول اسپتال منتقل کردیا جبکہ جسٹس مقبول باقر کو سول اسپتال سے نجی اسپتال منتقل کردیا گیا جہاں ان کی حالت خطرے سے باہر بتائی جارہی ہے، زخمیوں میں پولیس اور رینجرز اہلکار بھی شامل ہیں جبکہ جاں بحق افراد میں جسٹس مقبول باقر کا ڈرائیور بھی شامل ہے۔

بم ڈسپوزل اسکوڈ نے دھماکے کی ابتدائی رپورٹ تیار کرلی ہے جس کے مطابق دھماکا خیز مواد موٹر سائیکل میں نصب تھا جو پلانٹڈ ڈیوائس کے ذریعے کیا گیا جس میں 6 سے 8 کلو گرام دھماکا خیز مواد استعمال کیا گیا، دھماکے میں بال بیئرنگ اور لوہے کے ٹکڑے بھی استعمال کئے گئے۔

ڈی آئی جی ساؤتھ امیر شیخ کے مطابق دھماکے سے 3 پولیس موبائل اور 2 موٹر سائیکلوں کو نقصان پہنچا، ان کا کہنا تھا کہ دھماکے کی تحقیقات کے لئے ٹیم تشکیل دے دی گئی ہے جبکہ  پولیس نے علاقے کو گھیرے میں لے کر تحقیقات شروع کردی ہیں۔

جائے حادثہ پر میڈیا سے گفتگو کرتے ہوئے وزیر اطلاعات سندھ شرجیل میمن نے کہا کہ ہم جسٹس مقبول باقر کے لئے دعاگو ہیں، دھماکے میں ایک رینجر اور 6 پولیس اہلکار جاں بحق ہوئے، دھماکے کی نوعیت کے متعلق ابھی کچھ نہیں کہا جاسکتا، انہوں نے کہا کہ حکومت نے تمام ججوں کو سیکیورٹی دی ہوئی ہے، جسٹس مقبول باقر کے ساتھ بھی 3 پولیس موبائل تھیں۔

دوسری جانب سندھ بار کونسل نے عدالتی بائیکاٹ کا اعلان کردیا ہے جس کے بعد سٹی، ڈسٹرکٹ ملیر اور سندھ ہائیکورٹ میں عدالتی کام معطل کردیا گیا ہے۔

بالی ووڈ اسٹار سنجے دت ان دنوں غیر قانونی اسلحہ رکھنے کے جرم کی سزا پوری کرنے کے لیے بھارتی ریاست پونے کی یرواڈا جیل میں قید ہیں تاہم منا بھائی کو جیل میں اپنی اہلیہ مانیاتا دت کی یاد اس قدر ستانے لگی کہ انہوں نے اپنی شریک حیات سے مسلسل رابطے کا ذریعہ تلاش کر لیا ہے۔

بھارتی اخبار کے مطابق سنجے دت کے جیل جانے کے بعد سے ایک ڈاکیہ (پوسٹ مین) نرگس دت روڈ پر تعمیر امپیرئل ہائٹس کے دروازے پر کثرت سے نظر آتا ہے اور  اس کے پاس اکثر نویں منزل پر رہائش پذیر سنجے دت کی اہلیہ مانیاتا دت کے لیے خط ہوتا ہے۔ ذرائع کا کہنا ہے کہ سنجے دت روزانہ اپنی اہلیہ کو عام ڈاک کے ذریعے خط لکھتے ہیں جس کے جواب ميں انہیں اپنی اہلیہ کی جانب سے بھی ایک خط روزانہ موصول ہوتا ہے۔

واضح رہے کہ بھارت کی متنازعہ ٹاڈا کی عدالت نے سنجے دت کو غیر قانونی طور پر رائفل اور پسٹل خریدنے کے جرم میں 6 سال کی سزا سنائی تھی جسے سپریم کورٹ نے کم کرکے 5 سال کر دیا تھا، سنجے دت 18 ماہ کی قید پہلے ہی کاٹ چکے ہیں جب کہ بقیہ قید وہ ان دنوں پونے کی یرواڈا جیل میں پوری کر رہے ہیں۔

آئی سی سی ون ڈے رینکنگ میں پاکستانی کپتان مصباح کو ایک درجے ترقی نے بیٹنگ میں 9 ویں پوزیشن دلادی۔

چیمپئنز ٹرافی میں یکسر ناکامی کے باوجود گرین شرٹس کی چھٹی پوزیشن قائم رہی، چیمپئنز ٹرافی جیتنے والی بھارتی ٹیم کے رویندرا جڈیجا نے بولنگ میں کیریئر کی بہترین تیسری پوزیشن حاصل کرلی۔

آل رائونڈرز میں بھی وہ اسی نمبر پر آگئے، 6درجے کی چھلانگ نے روی چندرن ایشون کو بھی دوبارہ ٹاپ10میں پہنچا دیا،ویسٹ انڈیز کے سنیل نارائن پہلے اور پاکستانی اسپنر سعید اجمل بدستور دوسرے نمبر پر ہیں، ٹیم رینکنگ میں بھارت کی پہلی پوزیشن مستحکم ہوگئی، انگلینڈ دوسرے، آسٹریلیا تیسرے، جنوبی افریقہ چوتھے اور سری لنکا پانچویں نمبر پر براجمان ہے۔

چاہنے والوں کے لیے دبئی میں تقریب میں کرینہ کپور کے دیدہ زیب کپڑوں کی نیلامی کی گئی۔

نیلامی کا مقصد دبئی میں بے سہارا اور معذور بچوں کے لیے بنائے جانے والے اسپتال کے لیے فنڈز اکٹھے کرنا تھا جس میں بالی وڈ فنکاروں کی اشیاء کو خصوصی طور پر نیلامی کے لیے پیش کیا گیا۔

نیلامی میں دیپکا پڈوکون، بالی وڈ دبنگ سلمان خان، بالی وڈ کوئن کرینہ کپور، رنبیر کپور، ایکشن کوئن کترینہ کیف سمیت دیگر کئی فنکاروں کے استعمال میں لائی جانے والی اشیاء کی نیلامی کی گئی۔فلم ریس ٹو میں اداکارہ دیپکا پڈوکون کا زیب تن کیاگیا سرخ لباس نیلامی کے لیے پیش کیا گیا جس کی بولی 8 ہزار درہم لگی جب کہ بالی ووڈ بے بو کرینہ کپور کی مختلف فلموں میں بطور ہیروئن زیب تن کی جانیوالی شلوار قمیص 10 ہزار درہم میں فروخت ہوئی۔

گلگت بلتستان میں دہشت گردی کی واردات کر کے پاکستان کا عالمی امیج تباہ کرنے کی کوشش کی گئی ہے۔ 

گلگت بلتستان میں ہونے والی دہشت گردی کی واردات نے پورے ملک کو ہلا کر رکھ دیا‘ دیامیر فیری میڈوز کے علاقے نانگا پربت بیس کیمپ میں ہفتے اور جمعہ کی درمیانی شب دہشت گردوں نے 9 غیر ملکی سیاحوں اور ایک پاکستانی کو قتل کر دیا اور فرار ہو گئے۔ قتل ہونے والے غیر ملکی سیاحوں کا تعلق عوامی جمہوریہ چین‘ روس اور یوکرائن سے بتایا گیا ہے۔کالعدم تحریک طالبان پاکستان نے اس دہشت گردی کی واردات کی ذمے داری قبول کرلی ہے۔ کالعدم تحریک طالبان پاکستان کے ترجمان کے حوالے سے میڈیا میں جو بیان آیا ہے‘ اس میں کہا گیا ہے کہ یہ حملہ تحریک سے منسلک جنود حفصہ نامی تنظیم نے کیا ہے اور ہم گلگت بلتستان میں غیر ملکی سیاحوں پر حملے کی ذمے داری قبول کرتے ہیں۔

تحریک طالبان کے ترجمان نے جس تنظیم کا نام لیا ہے‘ یہ پہلے کبھی سننے میں نہیں آیا۔ اس کا مطلب یہ ہے کہ ٹی ٹی پی کے زیر سایہ کئی تنظیمیں کام کر رہی ہیں۔ پاکستان کی ایجنسیوں کے لیے یہ ایک نیا پہلو ہے۔ میڈیا کی تفصیلات کے مطابق 18 ملکوں کے 40 سیاح کوہ پیمائی کے لیے آئے ہوئے تھے‘ ان میں 11 سیاح بیس کیمپ میں موجود تھے جب کہ باقی ان سے اوپر موجود تھے۔ بیس کیمپ میں موجود 11 میں سے 10دہشت گردوں کا نشانہ بنے جب کہ ایک چینی سیاح محفوظ ر ہا۔ ابتدائی اطلاعات کے مطابق دہشت گردوں کو بیس کیمپ تک دو گائیڈز لے کر گئے‘ ان دو گائیڈز میں سے ایک سیکیورٹی فورسز کے ساتھ فائرنگ کے تبادلے میں مارا گیا جب کہ ایک حراست میں ہے۔ اس زیر حراست گائیڈ سے خاصی معلومات مل سکتی ہیں۔

گلگت بلتستان میں جو دہشت گردی ہوئی ہے‘ اس کی صدر مملکت آصف علی زرداری‘ وزیراعظم میاں نواز شریف سمیت سب نے مذمت کی ہے‘ قومی اسمبلی نے متفقہ طور پر ایک مذمتی قرار داد بھی منظور کی ہے‘ گلگت بلتستان کے چیف سیکریٹری اور آئی جی کو معطل کیا گیا ہے۔ دفتر خارجہ نے بھی کہا ہے کہ سیاحوں پر حملے کا مقصد پاکستان کا بین الاقوامی تشخص خراب کرنا ہے۔ وفاقی وزیر داخلہ چوہدری نثار علی خان نے قومی اسمبلی میں کہا کہ یہ پاکستان پر حملہ ہے۔ یہ ایسی باتیں اور اقدامات ہیں جو ہر دہشت گردی کی واردات کے بعد دیے جاتے ہیں لیکن دہشت گردی‘ دہشت گردوں اور ان کے سرپرستوں کے بارے میں کوئی پر عزم اور دو ٹوک پالیسی کہیں نظر نہیں آتی۔یہی وجہ ہے کہ پاکستان دہشت گردوں کے لیے ایک سافٹ ٹارگٹ بن چکا ہے۔

وہ جہاں چاہتے ہیں واردات کر لیتے ہیں۔ اول تو کوئی دہشت گرد گرفتار ہی نہیں ہوتا ‘ اگر کسی کو گرفتار بھی کیا گیا ہے تو وہ عدم ثبوت کی بنا پر باعزت بری ہو گیا ہے۔ یوں دیکھا جائے تو دہشت گردوں کو حقیقی معنوں میں کوئی نقصان نہیں پہنچا۔ تحریک طالبان کو جو رہنما مارے گئے ہیں ‘ وہ بھی امریکی ڈرون حملوں کا نشانہ بنے۔ پاکستان کے کسی ادارے نے انھیں گرفتار کیا اور نہ ہی وہ ان کی گولیوں کا نشانہ بنے۔ پاکستان شاید دنیا کا واحد ملک ہے جہاں سیاسی و مذہبی جماعتیں برملا دہشت گرد تنظیموں سے مذاکرات کی باتیں کرتی ہیں اور ان سے روابط کا اعتراف کرتی ہیں۔ دہشت گرد تنظیمیں پاکستان کے اندر ہی آپریٹ کر رہی ہیں اور وہ یہ واردات کے بعد اس کی ذمے داری بھی قبول کرتی ہیں‘ اس حوالے سے کوئی ابہام نہیں ہے لیکن عجیب بات یہ ہے کہ اس کے باوجود ملک کی بعض نامور شخصیات‘ سیاستدان اور مذہبی رہنما کالعدم تحریک طالبان اور دیگر تنظیموں سے مذاکرات کی بات کرتے ہیں‘ اکثر دلیل دی جاتی ہے کہ امریکا طالبان سے مذاکرات کر رہا ہے تو ہم کیوں نہیں کر سکتے۔

ایسی بات کرنے والے حلقوں کو شاید یہ بات معلوم نہیں ہے کہ دوحہ میں جو مذاکرات ہونے جا رہے ہیں‘ ان کی پہلی شرط یہ ہے کہ وہ افغانستان کے موجودہ آئین کو تسلیم کریں گے۔ کیا کالعدم تحریک طالبان نے پاکستان کے آئین کو تسلیم کرنے کی کبھی بات کی ہے؟ اس میں شک و شبے کی کوئی گنجائش نہیں ہے۔ دہشت گردی میں ملوث تنظیمیں پاکستان کی دشمن ہیں۔ گلگت بلتستان میں دہشت گردی کی واردات کر کے پاکستان کا عالمی امیج تباہ کرنے کی کوشش کی گئی ہے‘ بے گناہ انسانوں کو سیاسی ایجنڈے کی تکمیل کے لیے قتل کرنا بدترین جرم ہے اور اسلام کی رو سے ناقابل معافی گناہ ہے۔ایسا قبیح جرم کرنے والے کسی رعایت کے مستحق نہیں ہیں۔

پاکستان کی حکومت‘ اداروں‘ سیاستدانوں‘ مذہبی رہنمائوں‘ شاعروں‘ ادیبوں اور اہل علم کو اس معاملے میں چونکہ چنانچہ‘ اگر مگر کی روایت ترک کر کے دہشت گردی کے خلاف متفقہ موقف اپنانا چاہیے اور پوری قوم کو متحد ہوکر دہشت گردوں کے خلاف سینہ سپر ہوجانا چاہیے‘ اس طریقے سے ہی وطن عزیز کا تحفظ کیا جا سکتا ہے۔اگر دہشت گردی کے معاملے میں قوم کو ابہام میں رکھنے کی پالیسی برقرار رکھی گئی تو آنے والے دنوں میں وطن عزیز کو ناقابل بیان مشکلات کا سامنا کرنا پڑ سکتا ہے۔

وبائی وزیرمذہبی امور حبیب الرحمٰن نے روزہ اور عید کے معاملے پر مقامی علما و رویت ہلال کمیٹیوں کے بجائے مرکزی رویت ہلال کمیٹی کے فیصلے پرعمل کرنے کا عندیہ دیتے ہوئے واضح کیا ہے کہ روزہ 
اور عید کا اعلان کرنا مرکزی رویت ہلال کمیٹی کا کام ہے۔

جبکہ مقامی اور زونل رویت ہلال کمیٹی کا کام صرف شہادتوں کو مرکزتک پہنچانا ہے جس کی پرکھ کرنا بھی مرکزی کمیٹی ہی کا کام ہے، صوبائی وزیر نے ایکسپریس کو بتایا کہ  مرکزی رویت ہلال کمیٹی کے ساتھ رابطہ کیا جائے گا تاکہ وہ رمضان اور شوال کے چاند کے حوالے سے شہادتوں کا انتظارکرے اوراطمینان کے ساتھ فیصلہ کرے۔

سابق فوجی آمرجنرل پرویزمشرف کے ’محفوظ راستے‘کی تما م امکانات پیرکواس وقت معدوم ہوگئے جب وزیراعظم نوازشریف نے آئین توڑنے پرآرٹیکل 6کے تحت ان پرغداری کامقدمہ چلانے کاتاریخی اعلان کرکے سویلین اختیارقائم کیا۔